Бит – билгэ – киһи айылҕа оҕото буоларын биир туоһута. Кини ис туруга тас тулалыыр эйгэни кытары быстыбат ситимин көрдөрөр. Инникини эрдэттэн билэргэ киэҥник тэнийбит ньымаларын бит, билгэ буолара.

Күн дьыл билгэтэ – Өбүгэлэрбит күнү дьылы билгэлээн, халлаан туругун, от – мас үүнүүтүн, кыыл – көтөр сырыытын эндэппэккэ сылыктаан, үлэлэрин хамнастарын лоп бааччы аттаран, олохторун – дьаһахтарын эрдэттэн тэринэллэрэ.

Көтөр – сүүрэр билгэтэ

• Курааҥҥа чыычаах, көтөр саҥата элбиир.
• Тураах быстахтык дааҕыргыы – дааҕыргыы хаппыт маска олороро – ардахха.
• Аҥыр ардахха 5 -7 төгүл мөгүрүүр, оттон курааҥҥа 1 -3 төгүл.
• Ардахха хоптолор үрэххэ – күөлгэ хойуутук мусталлар, саҥалара үксүүр.
• Ардах хараҥаччы сири кырсынан кырыйан намыһахтык көтөр
• Кус түөһүн уҥуоҕа ырааһа, тумана суоҕа – сайына кураан, аҥарынан өһөхтөөҕө – сайын сөрүүн, сөбүгэр ардахтаах, онтон бүтүнүү хараҥата – сайын ардахтаах буоларыгар.
• Курааҥҥа көтөрдөр үөһээнэн ааһалла, ардахха аллараанан көтөллөр.