Ыам ыйын 26 күнүгэр М.Т.Данилова — Хатыҥ Ай култуура сынньалаҥ киинигэр «Библионочь» диэн тэрээһин буолан ааста. Тэрээһиммитин нэһилиэкпит библиотекаря Мария Васильевна бэйэтин биир идэлээх кыргыттарын эҕэрдэлээн саҕалаата. Ол кэннэ 2 хамаандаҕа арахсан квест оонньууну оонньоттубут. Нумерология эйгэтин Ульяна Ивановна кылгастык кэпсээтэ,гринвей эмтээх чэйдэрин да боруобалаатыбыт уонна түмүгэр хатыҥ сэбирдэҕин хайдах оҥорорго мастер класс Екатерина Николаевна ыытта.
Ыам ыйын 25 күнүгэр уһуйааны бүтэрээччилэргэ балаҕаҥҥа алгыс буолла. Оҕолорбут кэлэн алгыс сиэрин — туомун ылынаннар, арчыланан, салама өрөн уонна култуура кииниттэн кыра сэмэй бэлэхтэри тутан үөрэн — көтөн бардылар.
Ыам ыйын 23 күнүгэр сайыны уонна сайылык күнүн көрсө кырдьаҕастарбытыгар кус миинин иһиитэ буолан ааста. 3 биэдирэ тобус толору миин иһэн чэй өрөн, оонньотон, ыллаан — туойан, ытык мааны дьоммут махталлара муҥура суох. Нэһилиэкпит булчут эр дьонугар байанайгыт бэлэҕиттэн күндүлээбиккитигэр барҕа махтал!
Ыам ыйын 19 күнүгэр аан дойдутааҕы дьиэ кэргэн күнүгэр аналлаах «Оҕо ийэтинээн», «Чэчир» оҕо уһуйаанын улахан бөлөҕө кэлэн кыттыыны ыллылар. Бэйэлэрин билиһиннэрэн, кыратык күрэхтэһэн ылан, үҥкүүлээн үөрэн — көтөн тарҕастылар.
Бүгүн ыам ыйын 16 күнүгэр балаҕаммытыгар Майатааҕы айыы балаҕанын алгысчыта Анна Иннокентьевна Климентова уонна Лидия Ивановна Андреева кэлэн айыы үөрэҕин ыыттылар. Хайдах сөптөөхтүк алгыс, сиэр — туом оҥорорго, арчылааһыҥҥа үөрэттилэр. Тула олорон сэһэргэһии, дорҕоону таһаары, аһаҕас кэпсэтии буолла.
Ыам ыйын 9 күнүгэр кыайыы күнүгэр аналлаах митинг уонна киэһэтин чүмэчи ууруута буолан ааста. Митиҥҥэ нэһилиэкпит аҕа баһылыга бэйэтин эҕэрдэтин тиэртэ. Митиҥ кэнниттэн ытыктыыр кырдьаҕастарбытын чэйдэтэн,эҕэрдэ нүөмэри оҕолоро,сиэттэрэ көрдөрөн кырдьаҕастарбыт үөрэн — көтөн тарҕастылар.Биһиги нэһилиэктэн СВОҕа сылдьар уолаттарбыт дьиэ кэргэттэригэр,нэһилиэкпит аҕа баһылыга бэйэтин сэмэй бэлэхтэрин туттартаата. Киэһээ 9 чаастан кыайыы монуменыгар чүмэчи ууруута буолла уонна оһуохайынан түмүктээтибит.
Улуу кыайыы күнүнэн эҕэрдэлиибит! Баҕарабыт эйэлээх халлааны, чэгиэн — чэбдик доруобуйаны,үлэҕитигэр, үөрэххитигэр үрдүктэн үрдүк ситиһиилэри!
