Бит – билгэ – киһи айылҕа оҕото буоларын биир туоһута. Кини ис туруга тас тулалыыр эйгэни кытары быстыбат ситимин көрдөрөр. Инникини эрдэттэн билэргэ киэҥник тэнийбит ньымаларын бит, билгэ буолара.

Күн дьыл билгэтэ – Өбүгэлэрбит күнү дьылы билгэлээн, халлаан туругун, от – мас үүнүүтүн, кыыл – көтөр сырыытын эндэппэккэ сылыктаан, үлэлэрин хамнастарын лоп бааччы аттаран, олохторун – дьаһахтарын эрдэттэн тэринэллэрэ.

Саас – кулун тутар 14 күнүттэн – ыам ыйын 21 күнүгэр диэри.

Саас – күн уһуура

• Муус устарга халлааҥҥа күөх чаан түстэҕинэ, сааскы, сайыҥҥы кэм үчүгэй буолар.
• Саас ньургуһун бөлөхтөһөн көхтөөхтүк тахсара – быйаҥ сайыҥҥа, от, сир аһа үчүгэйдик үүнэригэр.
• Саас ыам ыйа хаардаах буоллаҕына, сайын өһүөн.
• Ыам, бэс ыйдарыгар тыаллаах, сөрүүн, сииктээх  уонна улаханнык ардаабатаҕына, сайын быстах ардахтаах, күһүн быйаҥ буолар.
• Ньукуолун кэнниттэн тымныы, тыаллаах хаар – самыыр түстэҕинэ, сайын өһүөн, сөрүүн, сииктээх буолар, күһүн хаар эрдэ түһэр.
• Ыам, бэс ыйдара хайдаҕый да күһүн балаҕан ыйа эмиэ оннук буолара күүтүллэр.
• Ыам, бэс ыйыгар түһэр сылаас тыаллары кураан тыаллара дииллэр.