Олоҥхо декадатын арыллыыта
Сэтинньи 27 күнүгэр саха балаҕаныгар «Уруйдан. Улуу Олоҥхо, Манчаары дойдутугар» олоҥхо дьоро күнэ буолан ааста. Тэрээһиммит бастакы чааһын алгыһынан арыйдыбыт, сиэри — туому ыытта СӨ культуратын туйгуна Галина Константинова. Олоҥхобут декадатын аһыллыытын биир дойдулаахпыт олоҥхоһуппут Григорий Егорович Слободчиков — Тэлээркэ сиэнэ Раиса Васильевна Стручкова, хос сиэнэ Татьяна Ивановна Романова, эһэлэрин туһунан сырдатан ахтан санаан аастылар. Кырачаан олоҥхоһуппут Айгылаан Нестеров «Модун Эр Соҕотох» олоҥхоттон быһа тардан иһитиннэрбитэ дьону кэрэхсэттэ. Дьурулуйар Ньургун Боотур Тэлээркэ олоҥхотуттан быһа тардан Галина Константинова уонна Розалия Нестерова толорон иһитиннэрдилэр. Иккис үөрүүлээх чааһынан ыраах сиртэн кэлбит ыалдьыттарбыт Дьааҥы улууһун киинниир библиотекатын кыраайы үөрэтэр салаатын үлэһитэ, Саргылана Семеновна Слепцова. Уус Алдан улууһун Бэйдиҥэ нэһилиэгин култуура сынньалаҥ киинин директора, Игнатий Васильевич Слепцов. Саха Өрөспүүбүлүкэтин култууратын туйгуна , В.П.Ларионов аатынан Майа орто оскуолатын фольклорга учуутала, улуустааҕы «Кэрэли» эбии үөрэхтээһин киинин үрдүкү категориялаах педагога,биһиги кийииппит Ульяна Максимовна Ефремова. «Дьааҥы олоҥхолорун толоруутун уратылара» диэн программалаах кэлэн бэрт сэргэхтик бэйэлэрин улуустарын олоҥхолорун иһитиннэрэн, кэпсээн дьон биһирэбилин ыллылар. Ходоро нэһилиэгин тыа сирин түөлбэтин аҕа баһылыга Федоров Виктор Егорович кэлбит ыалдьыттарга махтанан өйдөбүнньүк бэлиэни туттартаата. Дьоро күнү иилээн саҕалаан ыытта кулууппут директора Атласова Саргылана Иннокентьевна.
