«Библионочь акция» Муус устар 19 күнүгэр «Саха сириэ — мин дойдум» тэрээһин буолан ааста. Бу күн Мария Васильевна араас Саха сирин оонньууларын оонньотто. Уус уран ааҕыы кафета, Саха сирин туһунан значоктар быыстапката, быйылгы саҥа тахсыбыт кинигэлэри билиһиннэрии, минньигэс астаах дьиэ кэргэн уонна да элбэх араас сэргэх күрэхтэр буоллулар.
Муус устар 12 күнүгэр В.В. Скрябин аатынан Чүүйэтээҕи орто оскуолаҕа үөрэнээччилэргэ, төрөппүттэргэ анаан «Поехали» космонавтика күнүгэр аналлаах ракета быыстапката буолан ааста.
Муус устар 13 күнүгэр Майа сэлиэнньэтигэр «Дьиэ кэргэн — дьол биһигэ» диэн ааттаах истиҥ уонна дириҥ суолталаах көрсүһүү буолан ааста. Биһиги нэһилиэктэн эдэр дьиэ кэргэттэр баран истэн астынан, үөрэнэн кэллилэр. Ыҥырыылаах ыалдьыттарынан Светлана, Анатолий Бурнашевтар уол уонна кыыс оҕо оскуолаларын, уһуйааннарын төрүттээччилэрэ. Лилия, Ньургун Бэчигэннэр «Сахалыы» саха тылын үөрэтэр сыһыарыы төрүттээччилэрэ. Кэрэли Кирилина предприниматель, блогер, фотограф. Тэрээһини иилээн — саҕалаан ыытта Николь Егорова.
Муус устар 10 күнүгэр саха балаҕаныгар Арассыыйаҕа дьиэ кэргэн сылынан, Айыыһыт ыйа үүммүтүнэн Мэҥэ — Хаҥалас улууһун дьахталлар сүбэлэрин «Ийэ тыл» түмсүү, «Ыал эйгэтэ» бырайыак уонна «Дьүөгэлиилэр» аһаҕас пуорум десанын кытта көрсүһүү буолан ааста.
Муус устар 9 күнүгэр саха балаҕаныгар Ходоро нэһилиэгин чааһынай хаһаайыстыбалаах дьон уопсай мунньаҕа буолан ааста. Сиһилии «Ходоро ТВ» биэриигэ көрөөрүн.
Муус устар 7 күнүгэр булчут күнэ буолла. Булчут күнүгэр анаан нэһилиэк түмсүүлэрэ, «Күбэйэ» дьахталлар сэбиэтэ Брызгалова А.И салайааччылаах, «Эр дьон түмсүүтэ» Атласов И.И салайааччылаах, «Булчут» эр дьон түмсүүтэ Кузьмин Е.Б салайааччылаах, «Дьулуур» ыччат түмсүүтэ Чиряев Д.Ч салайааччылаах спонсордаан бириистэри туруордулар. Биирдиилээн күрэххэ анал бириистэри туруордулар Атласовтар дьиэ кэргэн хос эһээлэрин аатынан, Слободчиков Д.И анал бирииһэ уонна В.И. Яковлева кэргэнин аатынан анал бириис. Булчут күнүгэр аналлаах күрэххэ түөлбэ эр дьоно түөрт хамаанда туруордулар. 1 миэстэ — «Саһарҕа» түөлбэ 2 миэстэ —…
Муус устар 7 күнүгэр «Эбэ» күөлгэ кыһыны атаарыы, сааһы көрсүү тэрээһин буолан ааста. Нэһилиэк дьоно көхтөөх кыттыыны ылан бэрт сэргэхтик буолла. Оҕолорго, улахан дьоҥҥо көрдөөх оонньуулар, аралдьыйыылар буолан аастылар. В.В. Скрябин аатынан Чүүйэтээҕи орто оскуола, «Күнчээн» оҕо уһуйаанын тэрилтэлэрэ бэрт кыраһыабай фотозона оҥорон тэрээһин буолар сирин киэргэттилэр. Түөлбэнэн дьахталларга күрэхтэһии буолла. Кыайыылааҕынан «Айылгы» түөлбэ таҕыста.
Муус устар 2 күнүгэр Аллараа Бэстээх «Парус» элбэх хайысхалаах спортивнай дьиэтигэр сылын аайы ыытыллар улуустаа5ы быыстапка, дьаарбаҥка буолла. Дойдубутугар дьиэ кэргэн, Сахабыт сиригэр оҕо саас сылыгар анаммыт «Мэҥэ уус» быыстапкаҕа биһиги нэһилиэктэн Дмитриева Нюргуяна Васильевна уонна Аргунова Ирина Ивановна көхтөөх кыттыыны ыллылар. Кырдьык даҕаны бу дьоммут талааннара, оҥоһуктар, иистэрэ көрөргө кэрэтин. Дмитриева Нюргуяна Васильевна «Сыахайдар» хайысха5а I үрдэл үрдүк аатын сүкпүтүнэн эҕэрдэлиибит.